Corona-viru i globalización: ni el tren ni el turismu son solución

Uguañu es corrienti de ponel el provechu económicu porcima de tolas cosas, es lo que llamamus la idiología del pogressu. Esta postura coltural, basi del pensaeru uropeu delos siegrus acaberus, á síu una delas ideas huertis dela epoca en que vivimus. Dendi la conquista d’América i la colonización del mundu, i colas revolucionis liberalis, facistas i socialistas, la Modernidá s’assienta comu la edá crássica del muestru tiempu.

Por tiempu bastanti, el conceutu’l pogressu á guiau el creceeru delas cidais i metrópolis por tol mundu, el esparramamientu delos valoris liberalis, l’apartu dela naturaleza, la sobreprodución endustrial, la perda delas colturas tradicionalis i una economía sostribá ena moneda. Añus i añus d’esti sistema mos ain dau a muchus más añus de vida, quartus de bañu i papel del culu… peru a trocu amus perdíu la cenzillés, no sabemus lavoral comu la genti de patrás ni avalel-mus al monti, amus apreparau desequilibrus gravis ena naturaleza, vemus condenau millonis ala probitú i la hambri, i la huerça delas almas vivin dominás dunus pocus desalmaus. L’amol pol dineru es tan grandi qu’á hondeau con tolo más.

La Libertá a guial el puebru, Eugène Delacroix.
La dama dela Repúbrica, diosa del Estau liberal francés, llama alas gentis pala guerra.

Dendi l’estremeñeríu liberal o social-demócrata, se habra dela importancia de tenel güenas comunicacionis i sel escapás de brucheal con economías más huertis… no semus intolerantis cona postura esta porque paés la más lógica, peru… acasu mos amus pensau seriamenti lo que ganamus con ellu?

Amus a palral cona verdá: Estremaúra es la güerta d’Uropa i el sinu palas vacancias delas capas meyas delas cidais españolas i -de ca ves más- uropeas. Nel engranagi’l capitalismu mundial, i mesmu nel muestru Estau, semus cidadanus de segunda o tercera categoría: un territoriu dedicau ala produción de materias primas i energía palas capitalis d’ahuera. Estu velaquí no vai a mual porque tengamus más trenis o más aropuertus, namás valdría p’acomodal i agraval la sitación de soyugamientu en que vivimus.

Estremaúra produzi energía pal gastaeru de Madril.
El centru urbanu de Castilla ensuervi la produción del antigu Reinu de León.

Que la muestra tierra es una colonia ya lo dúan pocus estremeñus. I es qu’al puebru estremeñu la mundialidá, más que ganancias, mos á trayíu más emigración, los ucalitus, el calamoti de Guadiana, la seca delas anzinas, el encarecimientu delos precius, el fechi delos comercius chicus i la ruina del’agricoltura i la ganaería… peru a trocu ensiquiera mos á premitíu de la endustria, ni de conselval la muestra coltura, ni de mantenel la puebración ni de sel referencia n’aspeutu dengunu a nivel altu. No senifica essu que l’abrición total delas fronteras no mos á hechu tantu bien comu mos gusta de pensal?

No sedrá que mos tienin engañaus i que semus los perdeoris dela globalización? Entocis… paqué tantu tren? Paqué tantu turismu quandu el puebru no tien tierras ni Estremaúra tien un tecíu produtivu desenroau? En momentus d’emergencia comu esti lo arreparamus. El foturu imediatu paés que tira más pal acotamientu i los fechis de frontera que no pal’abrición delas sociedais o la espigaera dun solu polu geopolíticu.

Clisi ambiental: ríu Guadiana achipotau de calamoti, una pranta tropical p’adornal las peceras delas casas

L’andanciu de corona-viru es la calma enantis dela tormenta. La infeción paeci que no vai a sel causa de muchas muertis nel país, peru las enteracionis que mos dan a tentu dela maletía entovia son incompretas, en piyendu recada muchus científicus por no sabel-si entavía ni la huenti ni l’antigüedá dela malura.

Seya comu hueri, la campaña entrenacional de segureza arreol del viru aprepara una trashormación dela economía mundial en que la soberanía vai a tenel una importancia muchu más grandi que no daquí patrás. Las quarentenas s’usan tamién p’arrejuntal poel i pala piara no desmandal-si.

La mundialidá ya no da pa más, i la economía global vá a dal passu a mercaus continentalis más huertis i más baqueus entrenacionalis. Los luchis pola soberanía i las riñas de poel entri goviernus mundialis, estatalis i regionalis sedrán corrientis. Devemus de tenel calma, sí, peru tamién devemus de comprendel que las cosas ya no vain a sel comu eran. Tenemus de lucheal polo muestru.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s