El sentíu antigu delas Navidais

Enas sociedais uropeas de conçumieru, el celebramientu moernu d’aquestas fechas s’encevica enas mercas de comías, bebías i presentis. La fiesta de senificau cristianu s’á envertíu nuna epoca en que los trebajaoris-compraoris, uguañu urbanitas las más delas vezis, mos juntamus cona familia i los amigus pa desfrutal del sueldu gastau en güenas gandallas i bilistrajus. Las Navidais d’oi sonin un rehuiju familial dela edá capitalista. Peru no hue sempri assina…

Rama d’azevu n’iviernu

Enque solemus de relacional esta epoca cona nacencia de Cristu, en verdá las Navidais dimanan dunas fiestas del’antigüedá pagana, i que celebravan lo mesmu los celtas que los romanus. Las costumbris dela España romana s’acristianarun enos tiempus acaberus del Imperiu, i el sentíu primeru del assuntu hue enluxandu-si d’esta dotrina.

Quandu la cristiandá s’estaló n’Uropa, el creu d’esta seta judía se mesturó conas creyencias provincias. Los creoris de Jesús, dispués de consiguil en Roma la oficialidá dela su fé, acristianarun celebramientus gentilis comu el del Sol Envitu -Sol Invictus- o las Saturnalis -Saturnalia-, en que s’aponderava l’alargamientu delos días acontecíu cona llegá’l iviernu i se gozava conas vacancias dispués dela recoja.

Pintura dun Sol Envitu moernu

Los cristianus primerus se referían alos fielis dela religión dantis comu paganus -pueblerus, campurrus, catetos; de pagus, campu-, por sel los campusinus los más creoris delos diosis antigus; o gentilis -pola costumbri d’associal-si en tribus o familias grandis llamás gentes-. Assinque, lo qu’oi poemus llamal paganía o gentileza, consistía nun haci de cultus i mitus deferentis que convivían entri ellus i ellus, i qu’estavan endedicaus alos acontecimientus naturalis, las estacionis, los astrus, la Tierra, los elimentus i los diosis que representavan arquitipus umanus.

Los celtas i los romanus que pueblarun en tiempu tierras estremeñas mantuvun la erencia d’aquellas tradicionis, que muchus aspetus puein almiral-si lo mesmu enas Navidais tradicionalis comu enas hormas moernas dimanás dela Uropa germánica, peru… qué es lo que senifica esta fiesta? Pos velaí que un partu.

La Cristiandá trashormó muchus mitus solaris en otrus relacionaus cona vida de Cristu. No es casolidá que la Ilesia decidiera d’escogel el 25 deziembri de fecha pala nacencia de Jesús -tres siegrus aspués d’espenal esti…-, pos essi velaí es el día en que los zahorilis i veoris de mu patrás reconocierun el sosticiu del iviernu. La estoria pagana izi qu’essi día el sol renaci -el Niñu Dio-, pos esmiença a alumbral más oras col passu delos mesis.

Muchas colturas uropeas entovia compartin los símbolus dela tradición vieja, velaí los adornus coloraus i doraus, el arvu, los viejus barbúus que cain presentis, las estrellas, las luzis, velas, candelas i choscas; las coronas de ramas con frutus del tiempu, el leñu de Navidátrashogueru n’estremeñu-, el roscón de Reyis u otrus biscochus aparentis i el comeeru de raferías, dulçainas i carni pa engordal palos días arrezíus.

Lo que dendilogu no á muau muchu es qu’estus son días pa estal cona familia i tiempu pa reponel relacionis i hazel gavilla conos más allegaus. Días deque se haga la lus 🙂

Güenas fiestas!

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s