Tercera provincia estremeña?

La noticia á hechu sensación enos pedióricus dela Comunidá: la Asociación para la Siberia, Serena y Vegas Altas (ASISEVA) revendica la criación duna tercera provincia qu’albarqui las tres comarcas orentalis. Enque ai quien á queríu vél en esti assuntu la pantasma dela endependencia catalana, nós hallamus que simplimenti es una preva más del apuramientu del modelu territorial español.

Las provincias de Caçris i Badajó son las más ampias d’España. Alo contrariu delo que se piensa mucha genti, las provincias son costruicionis artificialis sin relación denguna cona coltura tradicional o la palra: son frutu duna rehorma lustrá del siegru XIX pa recinchal l’Estau astilu francés. En aquellus entoncis, Estremaúra ya era una tierra emprobecía por mé delas desamortizacionis liberalis, qu’arramplarun conas hesas boyalis i los montis del común i imprantarun el cortiju comu l’únicu sistema produtivu. Los campusinus s’envirtierun en siervus dun señoritu quasi siempri folasteru i la Modernidá s’assentó n’Estremaúra dela peol manera, pos la sitación económica esta es la causa dela hambri, el conflitu social i la emigración estremeña delos tiempus últimus.

No es que los de Talarruvias o Herrera s’aigan güeltu endependentistas, es que la continación d’esti modelu quasi que colonial no da pa más. Las nesseciais socialis i las trashormacionis económicas i colturalis que trai’l siegru XXI no casan con un inseñu territorial d’ai 200 añus qu’amás está hechu pa dessangral el puebru. Güenu está, peru… la solución es crial más provincias? Musotrus pensamus que no.

Estremaúra es una tierra imensa i mal comunicá por causa duna falta d’esplotación púbrica i abandoná de parti del Estau. Sabemus que es huerti izil estu, peru ya no poemus siguil dessimulandu i incultandu la verdá: la muestra tierra precisa una rehorma política i económica, precisamus:

· Comunicacionis: una redi de carreteras i vías de tren que ponga faci la movición interna, el enganchi conas capitalis d’España i Portugal i permita la salía i entrá de mercadorías pa favorecel el creceeru económicu i atrael capital.

· Esplotación púbrica (1): Estremaúra mereci más recussus i más atendimientu del Estau central, musotrus tamién nessecitamus un dineru que namás s’espeta pa Cataluña, el País Vascu i Madril; i precisamus que las impresas assitiás en Estremaúra quein los albitrius (2) aquí.

· Acomarcamientu (3): la Comunidá tien destensión bastanti i cidais mu desapartás entri ellas i ellas, es mestel una rehorma territorial que devida el país en comarcas o unionis de varias i que soponga las provincias i las deputacionis. La comarca es la fegura territorial natural i tradicional, devin de definil-si legalmenti i acebil competencias pal goviernu delos assuntus localis. El monecipiu tamién devi de dal passu al conceju: los puebrus án de poel sel más assolutus pa tenel más decisión enos assuntus cutianus.

Estamus ciertus deque si se tienin por cuenta aquestas consideracionis, el pobrema territorial en Estremaúra no s’á d’enconal comu n’otras tierras del Reinu.

(1) Inversión pública.
(2) Impuestos.
(3) Comarcalización.

Huenti dela retrataúra prencipal: Mery Camacho, Pinterest

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s