Estremaúra i Asturias son dos puebrus qu’andan a vivil una dispertación tardía dela su concencia coltural si l’acomparamus con otras zonas del Estau comu Cataluña, Galicia o el País Vascu; peru cuyamenti á queríu el sinu que’l Estau español i la Igresia católica descogieran el mesmu día pa celebral dambas a dos tierras.
El 8 de setiembri es una fecha que hazi onol ala Virgi de Gualupi nel casu muestru i ala Virgi de Cuadonga nel casu asturianu; peru dambus a dos celebramientus salierun palantri por una decisión política sin muchu acorpamientu del puebru. Uguañu, los estremeñerus revendican el 25 de marçu comu día d’Estremaúra -fecha en que s’alevantarun los campusinus contra los tierratenientis en el 36-, mentris que los asturianerus recraman el 25 de mayu -del 1808, quandi la Junta General d’Asturias se decraró soberana i se rebelló contra las tropas de Napoleón-. Mesmu nel día del mes concidimus estus dos puebrus …
No sacamus esta custión sin ton ni son, pos velaí que la fortuna paeci que güelvi a ajuntal otra ves los dos cabus del reinu leonés, oi qu’á tantu se dessepararun. Asturias i Estremaúra corrin agora comu antañu un caminu uníu dela Vía dela Prata, i esti velaquí no es otru que’l recobramientu dela escoltura tradicional por mé dela luenga.
Esti cenderu estóricu contra la semilación castillana vien de siempri, peru hue enos añus 70 del sieglu passau quandu los asturianus esmençarun a rebullil-si más seriamenti pola idioma. Dendi aquellas fechas, con subías i abaxás, no án parau d’aparecel bandus de tolas crassis i oficius en defensa’l asturianu comu Conceyu Bable (añus 70), Xunta pola Defensa de la Llingua Asturiana (añus 80), Iniciativa pol Asturianu (2011) i sotrus hatus setorialis. En el 1998, la Xunta Xeneral del Principáu d’Asturies aprovó la llamá Ley de uso y promoción del bable/asturiano, qu’obriga l’Estau a ofrecel alos astulfalantis atendimientu ena luenga dellus.
La llingua asturiana es ermana de sangri del estremeñu, pos dambas a dos sonin variantis deferentis estroncás del astul-leonés mediaval. Entri una i otra luenga, las simejanças fonéticas, morfossintácticas, ortográficas i de vocabulariu son incuentablis, comu despriquemus en el endilgu de Los soníus del estremeñu.
Los logrus pal estremeñu son más umildis que los del ermanu del norti, peru assín i tó las revendicacionis pola idioma ahilan i ajuntan a ca ves más genti enas callis i puebrus de Dehesia. Oi son muchus los concejus que s’arrochan a retulal castúamenti, i las ativiais i chalras alreol dela luenga son ya corrientis en abondas localidais. Cuentamus con una varianti escrita que vai ganandu pesu entri los palrantis i deprendientis, que se gasta n’estampas, letrerus, páginas-web, telivisión i prensa. El passu siguienti, no puei sel otru que la reconocencia oficial i l’aprendimientu enas escuelas.
Santu prencipal: Cogiendo moras, d’Eugenio Hermoso
