Hesa sin urañu

Dimpués de premitil la Junta d’Estremaúra la vestigación, i con el possibli sacaeru i processamientu d’urañu en deferentis fincas, comu la de Cabra Baxa, con una destensión de 7.150 ect., qu’albarca varius términus monecipalis (Çaínus, Oliva, Villanueva, Higuera i Xerés), amus criau una PRATAHORMA CIDADANA, con el afán de defendel la hesa del espoliju, los muestrus cidadanus dela malura i los muestrus cincu puebrus del despueblación.

L’impresa minera Qbis Resources S.L. apretendi sacal l’urañu a cielu abiertu. Sin echal en cuenta la rica biodiversidá dela zona i la salú de quien vivimus en ella. Lo mesmu que hazin en África. Dichu sistema de sacaeru’l urañu hazi que se desprenda una grandi cantiá de gas radón, un gas radiativu. La radiatividá no goli, no se vei, peru quea nel airi i nel’agua por sigrus. Es una impotencia de destruición dun alcanci i unus nivelis impresumiblis.

Vivimus ena zona más aprimía i umildi d’Estremaúra. La muestra endustria es básica. La vida enos muestrus puebrus es una batalla titánica pola sobrevivencia. Assín i tó, tenemus güena vida i un pratu ena mesa. D’abril-si la mina, la sitación vai a sel insustenibli. No es verdá que vaigan a ofrecel-mus colocación. Las minas a cielu abiertu no se hazin a picu i pala, se hazin con obrerus i máquinas especialis. Con estrumpíus i barrenus. En trocu, de no sel escapás de paral estu, naidi vai a mercal los produtus del guarru ibéricu, que passan por sel los mijoris del mundu, d’España. Ni los güeníssimus quesus de cabra. Ni la fruta. Ni los borregus. Ni los bezerrus. Ni el carvón. Ni las corchas. No quedrán ná d’esta tierra ala que quearán çamargullía nun huracu radiativu. Sedremus el Chernobi d’Estremaúra.

Comu veis, tenemus abondu que perdel. Los muestrus montis i el muestru porvenil a trocu de ná. Una piruga dela estampina que puei afetal tola tierra’l sul-ponienti.

Por essu, queremus que vos ajunteis en esti luchi qu’amus prencipiau pa defendel lo muestru i los muestrus. Sedrá una batalla titánica, mos hazemus cargu. En estas tierras nunca mos se dio ná de baldi. Semus acostumbraus a lucheal. La sobrevivencia aquí es rezia. Los muestrus antepassaus suarun ca cachinu de pan qu’arrancarun a esta hesa. Peru es la erencia que mos quearun. Esta naturaleza inigualabli, agria i hermosa. Arvus centenarius qu’enas ramas dellus se sujeta una economía probi de sossistencia.

Qué patrimoñu dimus a queal pala generacionis venieras si arramplan cona hesa p’abril la mina d’urañu?

Unu o más cratis horrus. Animalis maletus. Airi i agua enluxaus. I una ruleta russa de canci.

Tenemus de racional, tós uníus, antis que seya tardi.

Tenemus de izil un NO huerti i reondu, enantis que mos amotilin el foturu.

Un NO que mos degüelva la diniá.

Un NO que se salti la paré del repunteu que mos arrodea.

Un NO que haga de rehilal los murus dela Assamblea d’Estremaúra.

Un NO que se sienta n’España toa, en Portugal i, si es mestel, en el restu d’Uropa.

Un NO que mos atorgui el derechu de vel crecel los muestrus ijus, probis peru sanus, potreandu pola hesa hermosa ereá delos agüelus.

Tós uníus mos hadremus d’ascuchal.

NO ALA MINA D’URAÑU

Firma: PLATAFORMA DEHESA SIN URANIO

Pa leyel el bandu en castillanu, apreta velaquí

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s