La toñá

Los airis fríus d’estus días ya mos anuncian que se vai el veranu (enque paici que le cuesta!). La demuación trai la sotra estación, que llamamus otoñu, atoñá o toñá.

Enque el tiempu nuevu no despela las ramas delos belloterus penenis dela hesa, la yerva espiença a apreparal un mantu verdi qu’arropa las raízis delas anzinas, los alcornoquis i los mestus. Las billotas ván rindiendu-si – o atoñandu-si – i los hongus vain ansomandu la cabecina.

Enas sierras i vallis del norti d’Estremaúra, ondi’l paisagi es más bravíu i no albondeci la hesa, sí se puein almiral los tonus coloraus i amarilluchus que vain pintandu las cogollas delos castañaris i las robreas. Enos passeus, callis i praças delas cidais i los puebrus, los pratanerus i desotrus arvus folasterus tamién destiendin la estera parda polos enceraus.

Valli'l Ambrós
Valli d’Ambrós
Valli d’Ambrós

Es esti’l tiempu las castañas, las nuezis, los higus, los bembrillus, los piñonis, las granás, las almendras, las arvellanas, las uvas, las mançanas, las narãjas, las tãjarinas, las peras o las calabaças. Se comin enas muchas fiestas que se celebran en estus mesis, en que tamién se bichan dulçainas comu los güessus de santu, los ducis de bembrillu i los prestiñus; hueraparti delos carvotis -castañas assás- i los casamientus (higus passus con nuezis endrentu).

carvochá
Carvotá, carvochá o magostu

A tentu la religión, los estremeñus crestianus celebran los Tossantus el primeru de noviembri, quandi es costumbri recordal-si delos dehuntus. Amás, en Torrojonzillu se festeja la Encamisá i en Xarandilla los Escobazus, dambas a dos el 7 diziembri.

Los más gentilis se recuerdan delos antigus diosis i vén enos dissantus moernus los ecus delos festivalis delos puebrus de patrás. El nuestru Halloween, la chaquetía o chiquitía, atestiga la relación delos nuestrus rehuíjus conos delas gentis dantis dela cristiandá. Tamién mos acompara con otrus puebrus ibéricus i uropeus, que celebran estas fechas con costumbris aparentis.

Si la primavera es la nacencia la tierra i el veranu la moceá, la toñá es la descadencia qu’antecedi l’iviernu. Bienllegaus los esperezus enantis del sueñu la Tierra.

Huenti dela retrataúra prencipal.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s